"Siyasi istəklərdə yenidən güc amili ön plana çıxır"
Bu gün, 09:07
“Prezident İlham Əliyev Rusiya televiziyasına müsahibəsində dünyada baş verən proseslərin dəqiq təhlilini verdi. Prezident bir daha qətiyyətlə qeyd etdi ki, Azərbaycan dövləti müstəqil siyasət həyata keçirir, beynəlxalq aləmdə kifəyət qədər böyük siyasi nüfuza, eyni zamanda, iqtisadi və hərbi gücə malikdir. Bu isə milli maraqlarımızı təmin etməyə tam imkan verir. Prezident İlham Əliyev həmişə səmimi, açıq söhbətlər edib, uğurları da, problemləri də ilk növbədə xalqı ilə müzakirə edib. Xalq İlham Əliyevə böyük hörmət və ehtiram bəsləyir, ona inanır. Xalq da Ulu öndər Heydər Əliyevin dediyi kimi, özü qədər ona inanır və bu inam bu illər ərzində daha da möhkəmləndi”.
Bu sözləri İqtisadiyyat.az-a Milli Məclisin deputatı Bəxtiyar Əliyev deyib.
O bildirib ki, cənab Prezident İlham Əliyevin qeyd etdiyi kimi, Azərbaycan xarici siyasətinin xüsusiyyətlərinə görə istər Qərbdə, istərsə də Şərqdə müstəqil xarici siyasət yürüdən tam müstəqil aktor kimi qəbul edilir: “Bu, Azərbaycanın beynəlxalq aləmdə nüfuzunu daha da artırmış və o, birmənalı olaraq etibarlı tərəfdaş hesab edilir. Azərbaycan 44 günlük Vətən müharibəsində işğalçı Ermənistana qalib gələrək Zəfər tarixini yazdı və BMT TŞ-nin dörd qətnaməsini özü icra edib dövlətin ərazi bütövlüyünü, suverenliyini tam bərpa etdi. Bu haqq işində Azərbaycan xalqına mənəvi və siyasi dəstək verən isə qardaş Türkiyə dövləti oldu. Təsadüfi deyil ki, bu Zəfərdən sonra Azərbaycanla Türkiyə arasında müttəfiqlik haqqında tarixi Şuşa Bəyannaməsi imzalandı”.
“Cənab Prezident müsahibəsində geosiyasi proseslərə münasibət bildirərkən Şuşa Bəyannaməsini xüsusi vurğuladı və qeyd etdi ki, iki qardaş dövlətin bir-birinin ərazisində hərbi baza yaratmalarına ona görə ehtiyac yoxdur ki, bu iki qardaş xalq bundan sonra həmişə bir yerdə olacaq və onların ordusu da hər zaman bir yerdə olacaqdır. O, aydın şəkildə bildirdi ki, Türkiyə ilə Azərbaycan arasında imzalanmış Müttəfiqlik haqqında Bəyannamədə təhlükə və ya təcavüz zamanı qarşılıqlı hərbi yardımı nəzərdə tutan bənd var. Bunu hər bir dövlət nəzərə almalıdır. Prezident İlham Əliyev qeyd etdi ki, Azərbaycan-Türkiyə starteji müttəfiqliyi Qafqazda sabitliyin mühüm amilidir. Çünki bugünkü dünya və hadisələrin inkişafı bir daha sübut edir ki, dünya əsaslı şəkildə dəyişib və İkinci Dünya müharibəsi nəticəsində yaranmış reallıqlar, müəyyən edilmiş oyun qaydaları bu gün artıq işləmir, hətta qlobal aktorlar bunu gizlətmirlər. Siyasi istəklərdə yenidən güc amili ön plana çıxır. Bunu daha tez dərk edən ölkələr bu gün özlərini daha təhlükəsiz hiss edə bilərlər”, - deputat söyləyib.
B.Əliyevin sözlərinə görə, Cənubi Qafqazda gərginlik yaratmağa, hətta hərbi avantura planlarını gizlətməyən ABŞ və Fransa Azərbaycanın təhlükəsizliyini təhdid edir ki, Azərbaycanı özündən asılı vəziyyətə salsın və öz istəklərini diqtə etsin: “Bunun üçün isə Ermənistan həmişəki kimi bir alət olaraq istifadə edilir və "təhdidlərin kifayət qədər ciddi olduğunu göstərən çoxlu misallar var. Makron hökumətinin Ermənistana tədarük etdiyi silahlar hücum silahlarıdır, öldürücüdür və Azərbaycan üçün praktiki təhlükə yaradır. Nəzərə alsaq ki, Ermənistanla Azərbaycanın sərhədinin uzunluğu min kilometrdən çoxdur, bir çox yaşayış məntəqələri sərhədə yaxın yerləşib və bu yaşayış məntəqələrinin əksəriyyətinə keçmiş köçkünlər qayıdırlar, təbii ki, biz bu prosesi yalnız kənardan müşahidə edə bilmərik". Həm də nəzərə almaq lazımdır ki, Ermənistan tərəfdən sərhədlərimizə NATO-nun sayı bir neçə yüz nəfərə çatan “mülki qiyafədə” hərbi-kəşfiyyat missiyası yerləşdirilib və onlar vəziyyəti gərginləşdirməyə çalışırlar. Ona görə də Azərbaycan hərbi gücünü və müdafiə qabiliyyətini artırır. İstənilən xarici hərbi təhlükəyə sarsıdıcı cavab veriləcəkdir. Təhlükənin miqyasından asılı olaraq, preventiv tədbirlər də həyata keçirilə bilər”.
“Cənab Prezident müsahibəsində bir vacib məsələyə də diqqəti çəkdi. Bildirdi ki, Ermənistan tərəfindən Azərbaycana vurulmuş zərərin təhlilinə və hesablanmasına xarici ekspertlərin iştirakı ilə 4 il vaxt sərf edildi. Bu, təqribən 150 milyard dollardan çoxdur, yəni, işğal illərində vurulan zərərdir. Nəzərə alsaq ki, Ermənistanın ÜDM-i cəmi 24 milyard dollardır, onda həm Ermənistan, həm də onu silahlandıran dövlətlər bunun nə demək olduğunu aydın dərk etməli və düzgün nəticə çıxarmalıdırlar. Müsahibədə cənab Prezident dünya ictimaiyyətinin diqqətinə bir məsələni aydın şəkildə çatdırdı. Prezident qeyd etdi ki, Ermənistan öz Konstitusiyasını ona görə dəyişməlidir ki, konstitusiyada Azərbaycana ərazi iddialarının yer aldığı müstəqillik Bəyannaməsinə istinad var, burada keçmiş Dağlıq Qarabağ muxtar vilayəti Ermənistanın bir hissəsi elan olunur. Ona görə də Konstitusiyanın dəyişdirilməsi obyektiv zərurətdir. Eyni zamanda, münaqişə həll edildiyi üçün ATƏT-in Minsk qrupu da ləğv edilməlidir. Şübhəsiz ki, tarixin arxivinə verilmiş ATƏT-in Minsk qrupu çoxdan ləğv edilməli idi. Amma həmin həmsədr ölkələr bunu etmirlər. Niyə? Onlar nə istəyirlər? Reallığı, ədaləti niyə həzm edə bilmirlər?! Əlbəttə, bu, ritorik sualdır”, - deputat əlavə edib.
B.Əliyev vurğulayıb ki, iki ölkə arasında münasibətlərin normallaşması bu istiqamətdə ikitərəfli danışıqlar çərçivəsində həyata keçirilməli və sülh müqaviləsi bağlanmalıdır:
“Ermənistan və onu silahlandıran, dəstəkləyən, məsləhət verən ölkələr nəhayət anlamalıdırlar ki, sülhə, təhlükəsizliyə və davamlı inkişafa nail olmaq üçün qarşılıqlı etimad və hörmət əsasında konstruktiv əməkdaşlıq olmalıdır. Bunun alternativi yoxdur və Ermənistanı müharibəyə sürükləyənlər, əslində, onu fəlakətə aparır, bölgəni isə xaosa sürükləyirlər. Azərbaycan və Türkiyə bölgədə real siyasi, iqtisadi və hərbi güc olaraq buna qətiyyən imkan verməyəcək. Ona görə də Ermənistan və “silahdaşları” olan dövlətlər destruktiv addımlardan, qərarlardan çəkinməli, Azərbaycana qarşı qarayaxma kampaniyasını dayandırmalı, ədalətli mövqe tutmalı və bərabərhüquqlu qarşılıqlı əməkdaşlığa başlamalıdırlar. Belə olan halda Cənubi Qafqazda sülhü, tərəqqini və sabitliyi təmin etmək olar. Azərbaycanın iqtisadi potensialı imkan verir ki, Azərbaycan, Gürcüstan və Ermənistanın davamlı iqtisadi inkişafı təmin edilsin”.
Deputat təəssüflə qeyd edib ki, Qərbdə və ABŞ-də erməni lobbisinin təsir dairəsində olan bəzi siyasi dairələr və korrupsiya çirkabında “firavan” yaşayan bəzi siyasətçilər və QHT nümayəndələri nəinki Azərbaycanda, həm də dünənə qədər Avropa İttifaqında qəbul etməyə hazırlaşdıqları Gürcüstanda da siyasi sabitliyin pozulmasında maraqlı görünür: “Əgər belə olmasaydı, onda Gürcüstanın siyasi hakimiyyəti ilə əməkdaşlıq etmək əvəzinə ona qarşı siyasi təyziqlər artırılmaz və hansısa qərarların qəbul edilməsi zorla diqtə edilməzdi. İnanırıq ki, istər Avropada, istərsə də ABŞ-də cidi siyasətçilər demokratiyaya, konstruktiv və məhsuldar əməkdaşlığa sadiq olduqlarını bəyan edəcək və konstruktiv əməkdaşlıqda maraqlı olduqlarını əməli fəaliyyətləri ilə nümayiş etdirəcəklər. Cənubi Qafqazda sülh, sabitlik və iqtisadi inkişaf həm də Avropanın marağında olmalıdır”.
“Sonda bir daha vurğulamaq istərdik ki, Müzəffər Ali Baş Komandan İlham Əliyevin gələcəyə xidmət edən strategiyası sayəsində regionun beynəlxalq statusu dəyişmiş və region ölkələrinin inkişafı üçün yeni imkanlar açılmışdır. Münaqişənin həlli regionun təhlükəsizliyi və kommersiya cəlbediciliyi baxımından strateji əhəmiyyətə malikdir. Qələbə nəticəsində işğaldan azad edilmiş ərazilərin ölkənin ümumi iqtisadiyyatına reinteqrasiyası, yeni beynəlxalq və regional nəqliyyat-logistika dəhlizlərinin imkanlarından faydalanmaq nəinki Azərbaycanın, eləcə də bölgənin inkişafına böyük təkan verəcəkdir”, - deputat B.Əliyev əlavə edib.
Geri qayıt