Tramp-Putin görüşünə hazırlıqlar başlayır
Bu gün, 11:38
ABŞ-nın yeni seçilmiş prezidenti Donald Tramp Rusiya-Ukrayna müharibəsinin həlli üçün Rusiya prezidenti Vladimir Putinlə görüşməyə hazırdır.
Reyting.az xəbər verir ki, Donald Tramp Arizonada keçirilən “Turning Point USA” konfransında Rusiya-Ukrayna müharibəsini həll etmək üçün Vladimir Putinlə görüşü gözləyəcəyini bildirib.
Tramp əlavə edib ki, Putin onunla tez bir zamanda görüşmək istədiyini söyləyib və müharibəni bitirmək üçün bu görüşü gözləyir.
Ukraynadakı münaqişənin dəhşətlərindən bəhs edən Trampın sözlərinə görə, özü prezident olsaydı belə bir müharibə baş verməzdi. Yeni seçilmi prezident qeyd edib ki, bundan sonra ABŞ xarici müharibələrə girməyəcək: “İllərdir başqa ölkələri müdafiə etdik. İndi biz öz ölkəmizi müdafiə edəcəyik”.
Xatırladaq ki, yanvarın 20-də prezidentlik üçün and içəcək Tramp uzun müddətdir, Ukrayna və Yaxın Şərqdəki müharibələrə son qoyacağını bəyan edir.
Onu da qeyd edək ki, dekabrın 19-da keçirilən geniş formatlı mətbuat konfransında Rusiya lideri V. Putin ABŞ-nın yeni seçilmiş prezidenti D. Trampla görüşə hazır olduğunu və onunla görüşəcəyi təqdirdə bir çox gündəm mövzularını müzakirə edəcəklərini bildirib.
Geri qayıt