Mərkəzi bankın 3 qəpiklik ŞOUSU
Dünən, 06:40
Azərbaycan Mərkəzi Bankı (AMB) 3 qəpik nominalında yeni sikkələr təqdim edib. Daha əvvəl 1, 5, 10, 20 və 50 qəpik nominalında metal sikkələr də yenilənmişdi. Bankın mətbuat xidmətinin məlumatına görə, yeni sikkənin arxa tərəfində Azərbaycan Respublikasının gerbi və sikkənin zərb edildiyi il təsvir olunub, digər dizayn elementləri və texniki parametrlər isə dəyişməz qalıb. Yeni 3 qəpik sikkələr mövcud pullarla paralel şəkildə dövriyyədə olacaq.
İqtisadçı Natiq Cəfərli xaricdən yeni sikkələrin alınmasını iqtisadi baxımdan zərərli hesab edir. O, sosial şəbəkə olan Facebook-da alman şirkətlərinə 2023-cü ilin yanvar-noyabr aylarında Azərbaycana gətirilən 96.973 kiloqram metal külçələr üçün 5.845 milyon dollar ödənildiyi ilə bağlı rəsmi məlumatı paylaşıb. Bu külçələrdən sikkələr hazırlanır. Beləliklə, külçələrin orta gömrük qiymətinə əsasən, bir qramın dəyəri 6 sentə, yaxud 10 qəpiyə başa gəlir.
Türkiyədən gətirilən 17.945 kiloqram külçə üçün isə 1.263 milyon dollar ödənilib ki, bu da bir qram üçün 7 sentə, yaxud 12 qəpiyə bərabərdir.
Orta hesabla bir sikkənin (3, 5, 10, 20 və 50 qəpik nominalı arasında) çəkisi 5,1 qram təşkil etdiyini və müxtəlif metallardan hazırlandığını nəzərə alsaq, Cəfərli hesablayıb ki, hər bir 3 qəpik nominalında sikkənin hazırlanması və idxalı üçün 25-30 qəpik ödənilib.
İqtisadçı hesab edir ki, əhali getdikcə kartla ödənişə keçdiyi bir vaxtda 1, 3 və 5 qəpik nominalında sikkələrin hazırlanması və idxalı üçün belə dövlət xərcləri iqtisadi baxımdan səmərəsizdir. O, sual edir: bəlkə kimsə Azərbaycanda sikkə biznesində maraqlıdır?
“Dövlət məhsulun dəyərinin ona qoyulan sərmayədən 8-10 dəfə az olduğu zərərli bir müəssisədə maraqlı ola bilməz,” - deyə iqtisadçı yekunlaşdırıb.
"DİA-AZ"
Geri qayıt